Gen 25 | LID | STEP | Abraham sudi badih ari ja nyaran Katura.

Genesis 25

Abraham Imek

1 Abraham sudi badih ari ja nyaran Katura. 2 Eme badeh iy atehei nadun oro badeh Simran, Joksan, Medan, Midiyen, Isbak ma hawe Su-ah. 3 Seba hawe Dedan badeh tama uru badeh Joksan; ya lundriye Dedan oro badeh aloh Asura hawe aloh Letusa ma hawe Le-uma. 4 Ya nadu Midiyen oro badeh Epah, Eper, Hanok, Abida ma hawe Elda-ah. Oro doh bu-u oro badeh Katura.

5 Abraham badeh atehei lakou tan mari badeh i ta nadun Aisik. 6 Hawe iy udu ndra loken kahis le badeh, iy atehei lakou rayah i ta nadun ta udun ta nyeu ma tiye oro au a len ta lewa nadun Aisik. Oro ado munyak loboho an eme loken.

Abraham Imek Ma Iy I Lek

7 Abraham udu i alon handru ma jaha tan badeh asahan rinek ndru lunoh limeh (175). 8 Eme Abraham jaha tan i solo-an labai ano aden taku ma iy imek; iu i hawe tubun oro. 9 Eme badeh nadun uru, Aisik hawe Isma-el badeh ahi iy udu munu bek Makpelah mirihik ta Mamre udu manan ta Epron nadu Sohar badu Hita, 10 munyak le mene Abraham sihinei bwena badu mine iri Hita. Abraham badeh ahi iy udu hawe udun Sara. 11 Ano hamon ta Abraham ndramak badeh, Kindrei atehei nyosowan i ta nadun Aisik. Iy manyah badeh udu mirihik ta Ber Lahai Roi.

Nadu Isma-el Mwan

12 I dah badeh sare nadu Abraham Isma-el, nadun ta badih ta lahou ta Sara nyaran Haga badu Ijip.

13 Ya i dah badeh nyara nadu Isma-el oro, Kadok badeh Nebayot, Kedar, Adbe-el, Mibsam, 14 Misma, Dumah, Masa, 15 Hadat, Tema, Jetur, Napis ma hawe Kedemah. 16 I doh badeh nyara nadu Isma-el oro. Nyara oro lau ma ronoh la-uh doh badeh asahan boho kamen ma ronoh la-uh, in hamon ta ndrahu manyah udu kon ma ta tekedek tiri. 17 Isma-el badeh udu winiya jaha tan asahan rinek tonoh ndro taloh (137). Aden taku badeh ma iy imek iu i hawe tubun oro bwena. 18 Lundriyen oro badeh manyah ado loboho Habila ili taku Sur mirihik ta kobek badu Ijip, i buku none ou adek ala loboho Aseriya. Oro badeh manyah are len labai, ta lundriye Abraham oro.

Jekop Uru Iso

19 I dah badeh sare nadu Abraham Aisik. Abraham badeh atehei Aisik, 20 ano Aisik jaha tan asahan hanoh (40) badeh iy sudi nadu Betu-el Rebeka. (iy badu Aram badu Mesopotamiya nadu tine Leban). 21 Rebeka badeh kis iy bato-ou nah bwe, eme Aisik badeh amwekes salom i nyaran i ta Laban. Eme Laban badeh anuhun salom tan, eme ndrine Rebeka i tinan. 22 Eme uru nah are ndrinen badeh nyokolokon eme ma iy anya, “I buku sah lakou dah asahan tek?” Eme iy lelen Laban.

23 Eme Laban tiye i tan,

“Kon tinan munyak badeh udu ndrinem,
Ma uru lau ma la-uh ado ndrinem kameh atalan;
Iy ari kameh i boto-on labai ja ta iy ari,
Ma iy bwele-en kameh i ta asore i bahan.”
24 Eme badeh len eme mirihik ta iy anya kedeu nadun keme len, badeh uru mwimwir ado ndrinen. 25 Iy eme len bwena badeh badan saraman ma lamin solo-an; eme uru tondrohani nyaran Iso. 26 Ano ja badeh nadu tinen in hamon eme len ja badeh, minen tawi bwisimwe-e kati Iso. Eme nyaran badeh i Jekop. Aisik badeh jaha tan asahan ndro tonoh (60) eh, Rebeka atehei uru ame len.

27 Uru ma la-uh badeh a tinan ma Iso badeh asahan ndramak ta mwi. Iy ndramak ta edek i lokei. Arile Jekop badeh ndramak bohon bwe, iy badu bolo iri asiu balei le. 28 Aisik badeh aseken Iso, tasah Iso badeh atiye katin haka badu lokei eme, ya iy aimon, ya Rebeka badeh aseken Jekop.

29 Len ari badeh Jekop badeh amwekes ndranoh, eme Iso badeh edek udu lokei eme badeh iy imeson handru. 30 Eme iy tiye ta Jekop, “Suwi, se ndranoh saraman badeh keme jo kaimon. Jo ndrameson!” (eme badeh aloh iy Idom moson saraman).

31 Eme Jekop anya eh, “Badeh jo ki kadok eh?”

32 Eme Iso tiye, “Ou anyolom, jo kimek ai! Kadok badeh ari sasah tek?”

33 Arile Jekop anya, “Ou tandrakan bwena op.” Eme badeh iy tandrakan iy, ma atehei Jekop asahan kadok.

34 Ano badeh Jekop andrei jabi ramen rayah ma ndranoh ndronoha lentil i nan ma iy aimon ma iy a-un gwa ano iy suri iy ma iy iu. Iso badeh ndrakahei tanan mwasin nane ndra-au.